ဗြဟ္မာများနဲ့ ပတ်သက်သောမှတ်ချက်တချို့
--------------------------------------------------
ဗြဟ္မာများဟာ ရူပဗြဟ္မာဘုံ ၁၆-ဘုံ၊ အရူပဗြဟ္မာဘုံ ၄-ဘုံဆိုပြီး
ဗြဟ္မာဘုံ ၂၀-ရှိပါတယ်။ ကာမ ၁၁-ဘုံနဲ့ပေါင်းရင် ၃၁-ရှိပါတယ်။
ရူပဗြဟ္မာ-၁၆-ဘုံဆိုတာကတော့--
ပထမဈာန်သုံးဘုံ(ဗြဟ္မာ့ပါရိသဇ္ဇာဘုံ၊ ဗြဟ္မာ့ပုရောဟိတာဘုံ၊ မဟာဗြဟ္မာဘုံ)
ဒုတိယဈာန်သုံးဘုံ(ပရိတ္တာဘာဘုံ၊ အပ္ပမာဏာဘုံ၊ အာဘဿရာဘုံ)
တတိယဈာန်သုံးဘုံ(ပရိတ္တသုဘာဘုံ၊ အပမာဏသုဘာဘုံ၊ သုဘကိဏှာဘုံ)
စတုတ္ထဈာန်ခုနစ်ဘုံ(ဝေဟပ္ဖိုလ်ဘုံ၊ အသညသတ်ဘုံ၊ အ၀ိဟာ၊အတပ္ပါ၊
သုဒဿာ၊ သုဒဿီ။ အကနိဋ္ဌာလို့ခေါ်တဲ့ သုဒ္ဓါဝါသငါးဘုံ)တို့ဖြစ်ပါတယ်။
အရူပဗြဟ္မာ ၄-ဘုံကတော့--
အာကာသာနဉ္စာယတန ဘုံ၊ ၀ိညာနဉ္စာယတနဘုံ၊ အာကိဉ္စညာယတနဘုံ၊
နေ၀သညာ နာသညာယတနဘုံတို့ဖြစ်ပါတယ်။
-သုဒ္ဓါဝါသငါးဘုံဟာ အထက်အောက် အဆင့်ဆင့်တည်ရှိတယ်။
တပြင်တည်း တည်နေတာမဟုတ်ပါ။
အသညသတ်ဘုံနဲ့ ဝေဟပ္ဖိုလ်ဘုံတို့ဟာ ကောင်းကင်တပြင်တဲ
တည်ရှိပါတယ်။သို့သော် ဝေဟပ္ဖိုလ်ဗြဟ္မာများကနေရာတသန့်၊
အသညသတ်ဗြဟ္မာများက နေရာတသန့်တော့လို့တော့ မဆိုနိုင်ပါဘူး။
လူ့ပြည်မှာ အိမ်တွေရောနေသလို ရောနှောနေမည်သာဖြစ်ပါတယ်။
အောက်ဘုံများလဲ ဒီအတိုင်းပါပဲ။
--ရိုးရိုးကုသိုလ်ဖြင့် ဗြဟ္မာ့ဘုံ မရောက်နိုင်ပါဘူး။ ဈာန်ရမှသာ ဗြဟ္မာဖြစ်နိုင်တာပါ။
ပထမဈာန်ရရင် ပထမဈာန်ဘုံသာရောက်တယ်။ ဒုတိယဈာန်ရရင် ဒုတိယဈာန်
ဘုံကိုရောက်တယ်။---စသည်----
ပထမဈာန်ကို အဓိပတိလေးပါတပါး အညံ့စာဖြစ်လျက် ပွားများရင် ဗြဟ္မာ့ပါရိသဇ္ဇာဘုံရောက်တယ်။
ပထမဈာန်ကို အဓိပတိလေးပါး အလယ်အလတ်ဖြစ်လျက် ပွားများရင် ဗြဟ္မာ့ပုရောဟိတာဘုံရောက်တယ်။
ပထမဈာန်ကို အဓိပတိလေးပါးလုံး ထက်မြက်လျက်ပွားများရင် မဟာဗြဟ္မာဘုံရောက်တယ်။
ကျန်တာလဲ အတူတူ။
ပဉ္စမဈာန်ကို ပွားများရင် ဝေဟပ္ဖိုလ်ဘုံ၊ အသညသတ်ဘုံရောက်တယ်။
(သင်္ဂဟရှုပါ။)
--အောက်အောက် ဗြဟ္မာများက အထက် အထက်ဗြဟ္မာများကို မမြင်ရပါ။
တမင် ရုပ်ကြမ်း ဖန်ဆင်ပြမှ မြင်ရတာပါ။
အသညသတ်ဗြဟ္မာတို့မှာ ရုပ်ပဲရှိတာမို့ ဥယျာဉ်၊ ဗိမာန်ခံစားမှုမရှိ၊ ဈာန်ပီတိ
ခံစားမှုမရှိပါ။ ဈာန်သမာပတ် ၀င်စားမှုမရှိပါ။
အရူပဗြဟ္မာတို့မှာ ဘုံလို့ဆိုသော်လဲ တကယ်နေရာဘုံသီးခြားမရှိပါ။
ရုပ်မရှိဘဲ နာမ်သာရှိလို့ နာမ်ခနွာအစဉ်တည်ရာ ကောင်းကင်ပြင်သည်သာဘုံ
ဖြစ်ပါတယ်။ နာမ်သာရှိလို့ အထည်ဒြပ်မရှိပါ။
ဗြဟ္မာတို့ရဲ့ ကိုယ်ရောင်ကိုယ်ဝါဟာ လက်တချောင်းသည် စကြာဝဠာတထောင်ကို
လင်းစေနိုင်ပါတယ်။ဗြဟ္မာသည် နတ်ပြည်ကိုလာရင် အရင်ဆုံး ရှေ့ပြေးအရောင်
အလင်းကိုမြင်ရတယ်။
ဗြဟ္မာများဟာ အစာမစားဘူး။ ပီိတိနဲ့သာ နေကြတာပါ။ အထီးအမဆိုတာ မရှိပါ။
ယောက်ျားပုံသာရှိပါတယ်။ ကာမဂုဏ်စိတ် လုံးဝမရှိပါ။ တချို့က ဗြဟ္မ၀ိဟာရ
တရားပွားများ၊ ဈာန်သမာပတ်ဝင်စား။ အရိယာဗြဟ္မာများက ဖလသမာပတ်ဝင်စားပြီး
အေးချမ်းစွာနေကြပါတယ်။
့ဗြဟ္မာ့ပြည်ကနေ လူ့ပြည်ကိုရောက်လာသူများဟာ
မိန်းမနဲ့ အတွေ့အထိမခံလိုပါ။ ကာမဂုဏ် တပ်မက်စိတ်မရှိပါ။
နေရာထိုင်ခင်း သန့်သန့်ရှင်းရှင်းနေတယ်။ တခြားလူ ကိုယ့်နေရာမှာ
မထိုင်စေလိုဘူး။
သဟမ္ပတိဗြဟ္မာကြိးက ပထမဈာန်ဗြဟ္မာဘုံသား။ တနည်းအားဖြင့်
သုဒ္ဓါဝါသဘုံသားဖြစ်တယ်။
ဗကဗြဟ္မာကြီးကတော့ ပထမဈာန်ဘုံသားပါ။
--ဗြဟ္မာ့ပါရိသဇ္ဇာဗြဟ္မာများဟာ-အသင်္ချေယျကပ်ရဲ့ သုံးပုံတပုံအသက်ရှည်တယ်။
ဗြဟ္မာ့ပုရောဟိတြာ ဗဟ္မာများဟာ-အသချေ်ယျကပ် တ၀က်အသက်ရှည်တယ်။
မဟာဗြဟ္မာများဟာ-အသင်္ချေယျကပ် တကပ်အသက်ရှည်တယ်။
ပရိတ္တာဘာဗြဟ္မာများက-မဟာကပ် လေးကပ်အသက်ရှည်တယ်။
အပ္ပမာဏာဘာ ဗြဟ္မာများက-မဟာကပ် ရှစ်ကပ်အသက်ရှည်တယ်။
အာဘဿရာ ဗြဟ္မာများက-မဟာကပ် ၁၆-ကပ်အသက်ရှည်တယ်။
ပရိတ္တသုဘာဗြဟ္မာများက-မဟာကပ် ၃၂-ကပ်အသက်ရှည်တယ်။
သုဘကိဏှာဗြဟ္မာများက-မဟာကပ် ၆၄-ကပ်အသက်ရှည်တယ်။
ဝေဟပ္ဖိုလ်နဲ့ အသညသတ်ဗြဟ္မာများက-မဟာကပ် ၅၀၀-အသက်ရှည်တယ်။
အ၀ိဟာဗြဟ္မာများက-မဟာကပ်တထောင်။
အတပ်ပါက-မဟာကပ်နှစ်ထောင်။
သုဒဿာက-မဟာကပ်လေးထောင်။
သုဒဿီက-မဟာကပ်ရှစ်ထောင်။
အကနိဋ္ဌာက-မဟာကပ်တသောင်း ခြောက်ထောင်အသက်ရှည်တယ်။
အာကာသာနဉ္စာယတန ဗြဟ္မာများက-မဟာကပ်နှစ်သောင်း
ဝိညာနဉ္စာယတနက-မဟာကပ်လေးသောင်း။
အာကိဉ္စညာယတနက-မဟာကပ်ခြောက်သောင်း။
နေ၀သညာ နာသညာယတနက-မဟာကပ်ရှစ်သောင်းလေးထောင်
အသက်ရှည်ကြပါတယ်။
--ဗြဟ္မာတို့ သက်တမ်းဟာ ထိုဘုံမှာ အလွန်ဆုံးနေနိုင်တဲ့ သက်တမ်းသာ
ဖြစ်ပါတယ်။ ကမ္ဘာတ၀က် သို့မဟုတ် ကမ္ဘာပျက်ခါနီးမှာ ရောက်သွားရင်
သက်တမ်းစေ့အောင်မနေဘဲ သေရပါတယ်။ ကမ္ဘာမပျက်စေကာမူ ကံ
အ၇ှိန်ကုန်ရင်လဲ သက်တမ်းမစေ့ခင် သေကြရပါတယ်။
---ကမ္ဘာပျက်တဲ့အခါမှာ-
ဒီကမ္ဘာကြီးကို မီးဖြင့် ၇-ကမ္ဘာပျက်တယ်။ ၈-ကမ္ဘာမြောက်မှာ ရေတကြိမ်ဖျက်တယ်။
ဒီလိုမျိုး ၈-ကြိမ် ဖျက်တယ်။ဒါဆို ၈x၈=၆၄-ပေါ့။ အဲဒီ ၆၄-ကြိမ်မြောက်မှာ
ရေမဖျက်တော့ဘဲ လေတကြိမ်ဖြင့် ဖျက်ဆီးလိုက်တာပါ။(ဒီနေရာ ရှုတတ်တတ်တယ်)
မီးဖြင့်ဖျက်တာ( ၇x၈=၅၆-ကြီမ် )ဖျက်တိုင်း စကြာဝဠာ ကုဋေတသိန်းနဲ့တကွ ပထမဈာန်သုံးဘုံ အမြဲပါတယ်။
၈-ကြိမ်မြောက်မှာ ရေနဲ့ဖျက်တိုင်း ဒုတိယဈာန်ဘုံအထိပျက်တယ်။
နောက်ဆုံးအကြိမ် လေကြောင့် တတိယဈာန်သုံးဘုံအထိပျက်တယ်။
ဝေဟပ္ဖိုလ်ဘုံ၊ အသညသတ်ဘုံ၊ သုဒွါဝါသစတဲ့အထက်ထက်
ဘုံများကတော့ မီး၊ ရေ၊လေကြောင့် ဘယ်တော့မှ
ပျက်စီးခြင်းမရှိပါဘူး။ (ဘုံအိုကြီးတွေလို့ဆိုရမှာပေါ့။)
ဒါကြောင့် ကမ္ဘာပျက်တော့မယ်ဆို လောကဗျူဟာ နတ်များက
ဗြဟ္မာပြည်ရောက်အောင် တိုက်တွန်းတယ်ဆိုတာ
ဒီဘုံတွေကိုရောက်အောင်ပြောတာပါ။
အောက်ကိုးဘုံးကတော့ မီးရေလေကြေင့် မလွတ်လို့
အဲဒီ ကိုးဘုံကိုရောက်အောင်တိုက်တွန်းတာမဟုတ်ပါ။
ရောက်လဲရောက်ကြပါတယ်။ အပါယ်ဘုံသားတွေတောင်
အဲဒီအချိန်မှာ ဗြဟ္မာဘုံကိုရောက်ကြရပါတယ်။
ဘယ်သူမဆို ကုသိုလ်အနဲနဲ့ အများ လုပ်ဖူးသူတွေချည်းမို့
အပါယ်ဘုံသားဆိုပေမယ့် ဒီအချိန်ကျရင်
တချိန်ကလုပ်ထားတဲ့(အပရာပရိယဝေဒနိယ)ကုသိုလ်ကံက
အကျိုးပေးးခွင့်ရလို့ပါ။
---ကမ္ဘာပျက်တိုင်း ပထမဈာန်သုံးဘုံပါတဲ့အတွက် မဟာကပ်တကပ်
ကြာအောင် မတည်နိုင်လို့ ယင်း၏သက်တမ်းကို အသင်္ချေယျကပ်ဖြင့်သာ
သတ်မှတ်တယ်။
မီး ၇-ကြိမ်ဖျက်ပြီးနောက် ရေတကြိမ်ဖျက်မှ ဒုတိယဈာန်ဘုံများပါဝင်လို့ ဒုတိယဈာန်ဘုံမှစပြီး မဟာကပ်ဖြင့်ရေတွက်တယ်။
မောင်ကိတ်
No comments:
Post a Comment